Bakkafrost hálva milliard í vinningi í ár

Lidnu vørurnar geva framvegis undirskot. Men góði laksaprísurin ger, at úrslitið hjá Bakkafrosti eisini var gott í triðja ársfjórðingi. Úrslitið var 244 mió. kr. í vinningi fyri skatt og 200 milliónir eftir skatt, kunnger Bakkafrost í morgun. Til 1.oktober var úrslitið 553 milliónir fyri skatt og 451 milliónir eftir skatt.

20 mió. í halli

Men deildin, sum ger lidnar vørur, hevði 20 milliónir krónur í halli í triðja ársfjórðingi. Orsøkin er tann høgi prísurin, sum deildin noyðist at lata fyri laksin. Eftirspurningurin eftir laksi er størri enn útboðið. Tí hækkar prísurin.

Og prísurin fyri lidnar vørur er avtalaður hálvt ella heilt ár frammanundan í sølusáttmálum. Bakkafrost seldi 11.335 tons av laksi og setti 2,8 milliónir smolt út í triðja ársfjórðingi í ár.

Havsbrún 43 mió. í vinningi

Havsbrún hevði 43 mió. kr. í vinningi av rakstrinum í triðja ársfjórðingi, átta milliónir meira enn í fjør. Havsbrún hevur keypt meiri fisk í ár, og hevur tí kunnað gjørt mjøl og lýsi umframt laksafóður.