På vegne af Kongeriget Danmark

Danska stjórnin hevur givið landsstýrinum fulltrú at virka "på vegne af Kongeriget Danmark for så vidt angår Færøerne", nú landsstýrið hevur kært ES til heimshandilsfelagsskapin WTO. Tað stendur í einum uppriti hjá danska Uttanríkisráðnum.

Føroyar bóðu tann 4.november WTO um at viðgera handilsforðingarnar hjá ES móti Føroyum. Men Føroyar eru ikki sjálvstøðugur limur í WTO. Ríkið Danmark er limur í WTO, so tí noyddist landsstýrið at biðja Danmark um fulltrú til at fara í WTO við ES. Og tað fekk landsstýrið.

Hóast Føroyar sleppa at virka ríkisins vegna, er kongsríkið Danmark formligi mótparturin hjá ES í kærumálinum í WTO. Tað sama hendi í august, tá Føroyar stevndu ES inn fyri gerðarrætt eftir reglunum í havrættarsáttmálanum.