Makrelstríð forðar donskum skipum at fiska

Donsk skip sleppa ikki at fiska í norskum sjógvi, tí ES og Norra ikki eru vorðin samd um eina fiskivinnuavtalu fyri í ár.

Í minsta lagi 25 skip á vesturstrondini í Jútlandi eru rakt av banninum, skrivar danska kringvarpið. Orsøkin til bannið er, at samráðingarnar um nýggja fiskvinnuavtalu millum ES og Norra eru steðgaðar upp, skrivar DR.

Fiskimenninir hava gørn standandi í norskum sjógvi sum teir ikki sleppa framat. Og avleiðingin er minni inntøka, sigur Jan Hansen, formaður í Hanstholm Fiskeriforening, við heimasíðuna hjá DR. Sambært DR,  er tað makrelstríðið millum Føroyar og ES, sum forðar fyri øðrum avtalum um fiskirættindi.

ES upp í málið

DR skrivar, at danski matvørumálaráðharrin, Dan Jørgensen, hevur reist málið í ES.

Sambært formanninum í Hanstholm Fiskeriforening, bøtir tað ikki um støðuna, at Danmark sum partur av ríkisfelagsskapinum ikki atkvøddi fyri at seta tiltøk í verk móti Føroyum í sambandi við makrelósemjuna. 

Hetta hevur elvt til illvilja móti áhugamálum hjá donsku fiskivinnuni, bæði hjá norðmonnum og í øðrum ES-londum, skrivar danska kringvarpið.