Framsókn: Ikki privat bara fyri at vera privat

Framsókn heldur, at ætlanin hjá landsstýrinum at reka eitt havrannsóknarskip á privatum grundarlagi er spennandi, tí tað er eitt av høvuðsmálum floksins at fáa hóskandi almennar uppgávur liberaliseraðar ella einskildar.

Men Poul Michelsen, formaður í Framsókn, ávarar ímóti, at leisturin verður tann sami sum við Eysturoyartunlinum, sum privatir skuldu gera.

Má vera bíligari

Ætlanin er, at tað almenna skal binda seg til at leiga havrannsóknarskipið í 20 ár, men møguleiki skal vera at keypa skipið í hesum tíðarskeiðnum, ella tá leigusáttmálin er úti.

- Var hetta ikki júst sama grundgevingin fyri at lata privat byggja og reka ein Eysturoyartunnil, sum hevði kostað brúkarunum og føroyska samfelagnum fleiri hundrað milliónir krónur í meirkostnaði, spyr Poul Michelsen.

Tann ætlanin stóð beinleiðis í andsøgn við liberalu hugsjónina, sigur hann.

- Tá vit sleppa at síggja lógaruppskotið, fara vit at tryggja okkum, at tað privata ikki byggir eitt havrannsóknarskip, bara tí tað ikki rúmast í almenna íløgukarminum.

Treytin má vera, at ætlanin at byggja og reka skipið á privatum grundarlagi, má vera minst líka bílig og dygardgóð fyri almenningin, sum um tað almenna sjálvt bygdi tað, sigur Poul Michelsen, formaður í Framsókn.