Sjúklingar nøgdir við matin á Landssjúkrahúsinum

Nøgdsemiskanningin vísir, at sjey av átta sjúklingum halda, at maturin á deildini er góður ella sera góður.

Talið er høgt, um samanborið verður við donsk sjúkrahús, skrivar landssjúkrahúsið á heimasíðu síni, lsh.fo.

Døgurðin var máltíðin, ið flest vóru nøgd við. Hinvegin vóru nærum helmingurin av teimum spurdu ónøgd við tað, sum varð borðreitt fyri teimum seinnapartar og um kvøldið.

Fyri at bøta um tað, verður nú altíð borðreitt við frukt og øðrum seinnapartar, og um kvøldið fáa sjúklingarnir eyka proteinríkar dessertir.

Eta minni enn vanligt við innlegging

Kanningin vísir eisini, at tveir av trimum sjúklingum hava seinastu vikuna etið minni enn vanligt. Tað merkir, at tey eru í stórum vanda fyri føðslutroti.

Tí verður nú borðreitt við fleiri millummálum og orkuríkum drykkjum, og dagliga verður mett, um sjúklingurin hevur etið nóg mikið í mun til tørvin.

Kanningin er liður í kostverkætlanini, sum hevur til endamáls at kanna, um orku- og proteinríkur matur kann ávirka støðuna hjá sjúklingum, ið eru innlagdir á Landssjúkrahúsið.