Avlurting send til hoyringar

Politiið í Føroyum hevur víst á, at politiið, tá tað kannar brotsmál, ikki hevur møguleika at brúka avlurting í sínum arbeiði. Hetta tarnar nógv kanningararbeiðinum, sigur politiið.

Endamálið við broytingunum í fjarskiftislógini er at áleggja fjarskiftisveitarum í Føroyum skyldu til at hava neyðugu útgerðina, so politiið kann lurta eftir telefonum og lesa SMS-boð. Samstundis er lógaruppskot, avlurtingarpakkin sonevndi, í løgtinginum.

Hesar lógarbroytingar skulu geva politinum loyvi til at lurta eftir telefonum.

Rættargangslógin má broytast 

Talan er um broyting í rættargangslógini, tí er talan um ríkislógartilmæli, sum er í Rættarnevndini.

Broytingarnar í fjarskiftislógini fara at kosta veitarunum, Føroya Tele og Vodafone, 11,7 mió. kr., tí veitararnir skulu, sambært lógaruppskotinum, bera allan kostnaðin til útgerð og rakstur. Íløgan er mett at kosta tíggju milliónir krónur og raksturin 1,7 milliónir um árið.

Tó skal politiið rinda fyri upplýsingarnar, sum tað fær frá telefeløgunum. Internetavlurting er ikki við í lógaruppskotinum, sum er á veg í løgtingið úr Vinnumálaráðnum. Hoyringarfreistin er stutt, hon endar fríggjadagin.