Hækka aldursmarkið fyri at avhoyra børn

Ein lógarbroyting, sum umfatar videoavhoyring í Føroyum, er í Rættarnevndini hjá løgtinginum.

Limir í rættarnevndini hava hug at hækka aldursmarkið upp í 15 ár.  

Løgmansskrivstovan hevur spurt danska løgmálaráðið, hvat tað heldur um hetta.

Og Løgmálaráðið hevur avgjørt at viðgera spurningin um at hækka aldursmarkið, eisini í Danmark og Grønlandi.   

Hetta arbeiðið verður liðugt seinast í hesum árinum. Og tá er Løgmálaráðið sinnað at gera uppskot um broyting í føroysku rættargangslógini, so aldursmarkið eisini verður 15 ár í Føroyum.   

Videoavhoyring av børnum verður brúkt millum annað í málum um kynsligan yvirgang. Hetta verður gjørt fyri at barnið ikki noyðist at geva frágreiðing á rættarfundi, har sum nógv fólk eru, eitt nú fólkið, sum er ákært fyri at hava gjørt seg inn á barnið.

Videoavhoyringar verða eisini brúktar í Føroyum, men nú skulu greiðar reglur um tær setast í rættargangslógina.

Børn, sum eru 12 ár ella yngri, kunnu avhoyrast á sjónband.