Kystmagasinet: Ísland fjalir hagtøl

Seinastu fýra árini hevur Ísland forvunnið 4,4 miljardir uppá útflutningin av makreli, sum íslendsk skip hava fiskað. Íslendingar fáa góðan prís, og hava fingið fótafesti á fleiri marknaðum, og tí hava íslendingar, sambært Kystmagasinet, ongan áhuga í at gera eina avtalu við ES og Noreg um makrel. 

Inntøkurnar eru so góðar, at íslendska hagstovan hevur avgjørt at fjala tøl fyri íslendska útflutningin av markeli, skrivar Kystmagasinet.

Tað er tó trupult at samanbera norsk og íslendsk útflutningstøl, tí Noreg útflytir meira rundan frystan makrel, meðan Ísland útflytir avhøvdaðan makrel. 

Stýrd av politiskum áhugamálum

Kystmagasinet hevur roynt at fingið upplýsingar um, hvørji lond Ísland útflytir makrel til, og fyri hvønn prís. Men, skrivar Kystmagasinið:

- Íslendska hagstovan er stýrd av politiskum áhugamálum. Hon hevur góð hagtøl, har tú fært upplýsingar um útflutning til ymsu londini, nøgd, prís og hvat slag.

Men meðan annar fiskur er væl og virðiliga skrásettur undir rættari HS-kotu, er makrelurin fjaldur undir ymsum bólkum, so ikki ber til at finna hann.

Ongar upplýsingar um marknaðir

Granskarar og starvsfólk á íslendsku hagstovuni skúgva tilvitað allan professionellan etikk til viks, og lata politikkin gera av, hvat umheimurin skal hava atgongd til, skrivar Kystmagasinið.

Framleiðslur, sum verða útfluttar í smáum nøgdum, eru ikki lættar at finna í útflutningshagtølum, men at næstan allur útflutningurin av meira enn 100.000 tonsum ikki er at finna í íslendsku hagtølunum fyri útflutning - býtt út á marknaðir, er ikki vanligt, skrivar Kystmagasinet.