Lítil og eingin skattur frá føroyingum uttanlands

Útlendingar gera nógv størri íløgur í Føroyum enn føroyingar gera í øðrum londum. Men nógv fleiri føroyingar arbeiða í øðrum londum enn útlendingar í Føroyum.

Hvørki er nakar fyrimunur fyri skattainntøkurnar í Føroyum. Sambært teimum tvískattaavtalum, sum Føroyar hava við onnur lond, fær landið, har sum íleggjarin býr, skattin av vinningsbýtinum av íløguni í Føroyum.

Ójavni í skattainntøkunum

Støðan er í løtuni tann, at útlendingar gera nógv størri íløgur í Føroyum, enn føroyingar gera í útlondum, og gongur hesin ójavnin út yvir føroysku skattainntøkurnar frá vinningsbýti.

Tað sigur Jørgen Niclasen, landsstýrismaður, í svari til Høgna Hoydal, løgtingsmann, sum spurdi um tvískattaavtalur.

Meginreglan í tvískattaavtalum er eisini, at løn verður skattað í landinum, har sum fólk arbeiða. Nógvir føroyingar arbeiða í øðrum londum, men fáir útlendingar arbeiða í Føroyum. Hetta merkir, sigur Jørgen Niclasen, at vit lítlan og ongan skatt fáa frá týðandi parti av okkara arbeiðsstyrki.