Meir makrelur kann fiskast sigur ICES

ICES heldur nú, at til ber at fiska yvir eina millión tons av makreli í ár uttan at gera seg inn á stovnin.

Altjóða havgranskingarstovnurin mælti upprunaliga til ikki at fiska meira enn 890.000 tons í ár.

Men nú hevur stovnurin endurskoðað hesa meting.

Nú er í lagi at fiska millum 927.000 og eina millión og 11-túsund tons.

ICES hevur gjørt nýggjan leist at brúka, tá makrelstovnurin verður mettur.

Men sama hvat ICES sigur hava londini, sum fiska makrel, longu avgjørt at fiska upp í 1,4 milliónir tons í ár, sum eru 40 prosent meira enn nýggja tilmælið hjá ICES.