Joen Magnus formaður í grein 19 nevndini

Joen Magnus Rasmussen í Fólkaflokkinum er formaður í grein 19 nevndini hjá løgtinginum, sum skal kanna virksemið hjá Eik Grunnininum frá 2002 til 2010 og eftirlitið við grunninum frá 2002 til mai í ár.

Nevndin hevði sín fyrsta fund í morgun, og tá skipaði nevndin seg. 

Kristina Háfoss í Tjóðveldi er næstforkvinna, og í nevndini er eisini Helgi Abrahamsen í Sambandsflokkinum.

Johan Dahl boðin á fund

Nevndin hevur biðið Johan Dahl, landsstýrismann, koma á fund hósdagin í næstu viku.

Johan Dahl átti uppskotið til samtyktar um at seta grein 19 nevndina, og nevndin ætlar at tosa við hann um ætlanina og endamálið við uppskotinum.

Ein spurningur, sum hevur stungið seg upp, er, um løgtingið yvirhøvur kann kanna ein privatan grunn, sum Eik Grunnurin var.