Eingin avtala. Átta skip fingið flutningsloyvi.

Átta skip hava fingið loyvi frá Vørn at flyta makrel.

Men tað er ikki eydnast manningarfeløgunum og Reiðarafelagnum at gera avtalu fyri manningarnar á skipunum, sum sum fara at virka sum flutningsskip, taka makrel frá skipunum, sum fiska, og flyta hann til lands.

Reiðarafelagið gav fyrrapartin fríggjadagin mannningarfeløgunum eitt uppskot um avtalu fyri flutningsskipini.   

Manningarfeløgini viðgjørdu uppskotið og svaraðu Reiðarafelagnum fríggjakvøldið við einum mótuppskoti.

Og Reiðarafelagið hevur longu svarað manningarfeløgunum, segði Herálvur Joensen, stjóri í Reiðarafelagnum, við Útvarpið í gjár.

Tvey sløg

Talan er um tvey sløg av flutningsskipum. Nøkur hava fiskiloyvi, og tey kunnu tí bæði fiska og taka makrel frá øðrum. Onnur hava ikki fiskiloyvi og hava tí bara loyvi til at flyta fisk.

Sum skilst eru tað serliga skipini, sum eru flutningsskip burturav, manningarfeløgini og Reiðarafelagið ikki eru vorðin samd um.

Higartil hevur Vørn givið átta skipum flutningsloyvi. Skipini hjá Varðanum, sum hava fingið flutningsloyvi, hava fiskiloyvi, og tað hevur Atlantsfarið úr Miðvági eisini. 

Men hini trý skipini, sum hava fingið flutningsloyvi, hava ikki fiskiloyvi. Tey eru Grunnabarð, Saksaberg og Høgiklettur.