Roykiforboð: fiskimenn noyddust at leggja av

Roykiforboð hevur nú eisini sníkt seg inn í fiskiflotan, íslendska fiskiflotan.

Tá Sildarvinnslan á Norðfjørðinum keypti nótaskipið Børk úr Noregi varð avgjørt, at manningin sleppur ikki at roykja umborð.

Eitt rúm til roykjarar var í skipinum, tá tað varð keypt til Íslands í februar, men tað rúmið hevur ikki verið brúkt at roykja í, síðani Børkur kom undir íslendskt flagg.

Hvørki snús ella skrá

Skiparin sigur á heimasíðuni hjá reiðaríinum, at teir, sum royktu, fingu gylt høvi at leggja av. Og, leggur hann afturat, tíbetur fóru teir ikki at snúsa ella tyggja skrá í staðin fyri.

Skiparin sigur, at endamálið er at gera umstøðurnar hjá manningini betri fyri heilsuna, og harafturat slepst undan tubbaksroykinum og øllum óruddinum av tubbaki.

Skiparin sigur harafturat, at hann hevur ikki hoyrt nakran gramt seg um roykiforboðið. Tvørturímóti tykjast allir vera fegnir um at sleppa av við tubbakið umborð.