Aftur staðfest:Menn hava lítlan hug at granska

Nógv fleiri kvinnur enn menn í Føroyum hava hug at granska.

Tað varð staðfest eina ferð enn, tá freistin at søkja um pengar úr Sjúkrakassagrunninum var úti á middegi í gjár.

28 umsóknir komu, 20 frá kvinnum og átta frá monnum.

Fyrsti stuðul

Hetta er fyrstu ferð, Sjúkrakassagrunnurin letur stuðul til gransking.   

Stuðul kann latast til gransking á fimm økjum, og umsóknir komu til øll økini. 

Grunnurin letur í mesta lagi hálva aðru millión krónur til hvørt øki í hesum umfarinum.

Kannaðar gjølla

Granskingarráðið upplýsir, at nú verða umsóknirnar kannaðar fyri at vita, um tær lúka formligu treytirnar.

Síðani skulu útlendskir serfrøðingar meta um vísindaligu góðskuna í umsóknunum. 

Ein faknevnd er sett at viðgera og meta um umsóknir til Sjúkrakassagrunnin. 

Faknevndin ger tilmæli til Granskingarnevndina, sum tekur endaliga støðu í desember.

Tann 19.desember, sum er stovningardagur hjá fyrsta sjúkrakassanum í Føroyum, verður almannakunngjørt, hvørjar verkætlanir fáa stuðul.

Sjúkrakassapengar

Pengarnir í Sjúkrakassagrunninum eru fæið hjá sjúkrakassunum, sum góvust í 2010, tá Heilsutrygd kom.

Pengarnir, 28 mió. kr., skulu brúkast til at menna heilsuøkið í Føroyum.