Ferðavinnan ikki rættar karmar

Ferðafólk, sum koma higar, hava stóran áhuga fyri fornminnum, men nóg mikið er ikki gjørt til tess at skapa røttu karmarnar kring ferðavinnuna og fornminni.

Tað heldur Bjørt Samuelsen, løgtingskvinna úr Tjóðveldi, sum hevur sett Johan Dahl, landsstýrismanni, fyrispurning um málið.

Hon vísir á, at nógv fólk vitjar Múrin í Kirkjubø, men tað tykist verða avmarkað, hvussu nógv tey leggja eftir seg, og harumframt liggur tað á privatum hondum at halda umhvørvið viðlíka. 

Bjørt Samuelsen sigur, at heildarætlanin um at varðveita Kirkjubømúrin og forminni, sum eru knýtt at honum, viðger ikki ferðavinnuna. 

At ferðavinna er ein týdningarmikil partur, tá slíkar ætlanir verða gjørdar, er sjálvsagt, sigur hon í viðmerkingunum til fyrispurningin.