Uppsjóvarfiskur:næstan 400.000 tons minni í 2015

Allar heildarkvoturnar av uppsjóvarfiski eiga at vera minni næsta ár enn í ár, sigur ICES, næstan 400.000 tons minni enn í ár.

Altjóða havgranskingarráðið hevur kunngjørt tilmæli sítt fyri 2015 um uppsjóvarfisk.

Serliga er norðhavssildin illa fyri. ICES mælir til, at ikki verða fiskað meira enn 238.000 tons næsta ár. Tað eru 180.000 tons minni enn tilmælið var fyri 2014.

Ikki bara sildin

Tilmælið um makrel er 831.000 til 906.000 tons, sum eru okkurt um 100.000 tons minni enn í ár.

Um svartkjaftin sigur ICES 840.000 tons, 109.000 tons minni enn í ár.

Vanliga verður fiskað nakað væl meira enn fiskifrøðingarnir halda er ráðiligt, tí strandarlondini kunnu ikki semjast um, hvussu heildarkvoturnar skulu býtast.

Samráðingar um uppsjóvarfisk vera nú í oktober.