Lógir ikki almennar fyrr enn løgtingið fær tær

Aðalráðini hjá landsstýrinum kunnu nokta øðrum at síggja lógarsmíð, sum ikki kemur í løgtingið.

Aðalráðini kunnu eisini leggja lok á alt tað, sum onnur halda um slíkt lógarsmíð.

Tað er í stuttum niðurstøðan hjá Løgtingsins umboðsmanni. 

Innlit í hoyring

Løgtingsins umboðsmaður fekk kæru um, at Mentamálaráðið ikki vil geva innlit í hoyringarskriv til eitt lógaruppskot um Søvn Landsins og broytingar í lógum um ymisku søvnini. 

Lógin og lógarbroytingarnar komu ikki í løgtingið í farnu tingsetu, men vórðu útsettar til tingsetuna 2014. 

Lógin um innlit í almennu fyrisitingina sigur, at lógaruppskot, sum ikki eru komin í løgtingið, eru undantikin innliti fyri at tryggja fyrisitingini arbeiðsfrið.

Løgtingsins umboðsmaður sigur eisini, at sambært verandi rættarstøðu kann Mentamálaráðið tó umhugsa at geva meirinnlit í hoyringarskrivini, men hevur kortini ikki skyldu til tað.