Juncker komin í politiskt ódnarveður

Bara hálva aðru viku eftir, at Jean-Claude Juncker,tók við sum formaður í ES-nevndini, er hann komin í satt politiskt ódnarveður.

Hann var forsætisráðharri í Luxemburg í næstan 19 ár, til hann legði frá sær í desember í fjør.

Í farnu viku kom fram, at tað var í hansara stjórnartíð, at Luxemburg gjørdi avtalur við fleiri hundrað stór feløg, sum hava virksemi um allan heimin.

Avtalurnar hava gjørt, at stóru feløgini sluppu undan at rinda milliardir kr. í skatti, og Juncker skal hava hjálpt feløgunum við avtalunum.

Pepsi og Ikea

Nøvn sum Pepsi, IKEA og Deutche Bank eru millum feløgini, sum skulu hava fingið avtalu um skattalætta, kom fram í 28.000 skjølum, sum vórðu latin amerikanskum tíðindafólkum.

Seinastu fýra árini, sum Jean-Claude Juncker var forsætisráðharri í Luxemburg, var hann eisini fíggjarmálaráðharri, og tí eru atfinningarnar ímóti honum sera hvassar.

Í dag kom Juncker sjálvur á tíðindafund ,sum ES-nevndin javnan heldur, og har tók hann ábyrgdina av tí ,sum hendi í sínari tíð sum forsætis- og fíggjarmálaráðharri.

Hann segði bart út, at hóast skattaavtalurnar ikki vóru í stríð við lógirnar í Luxemburg og í ES, so var talan um óetiskar lógir.

Juncker varð m.a. spurdur, um hann sjálvur kundi standa á odda fyri eini kanningarnevnd, sum skal kanna skattaviðurskiftini, tá hann sjálvur hevði ábyrgdina av tí sum fór fram. Tí spurninginum svaraði hann ikki.

Næstformaðurin í ES-nevndini, Frans Timmermans, segði á fundinum, at øll ES-nevndin stuðlar Jean-Claude Juncker.

Støðan hjá nýggja ES-nevndarformanninum verður ikki betri av, at myndugleikarnir í Luxemburg vísa aftur, at nakað ólógligt er farið fram.

Og fíggjarmálaráðharrin í landinum, Pierre Gramegna sigur bart út, at mannagongdin við skattaavtalunum verður ikki broytt.