Nýggjur forseti í Rumenia

Rumenia hevur fingið nýggjan forseta. Talan er um Klaus Iohannis, sum er formaður í konservativa flokkinum í landinum og borgarstjóri í Sibiu. Hann er umboð fyri týskmælta minnilutan í landinum.

Forsætisráðharrin, Victor Ponta, viðgekk í gjárkvøldið, at hann hevði tapt valið í seinna umfarinum.

Ponta vann annars fyrra umfarið, men fekk ikki nóg mikið av atkvøðum fyri at verða valdur.

Victor Ponta hevur ligið á odda í meiningakanningunum upp undir valið í gjár, men munurin hevur verið lítil.

Leggur ikki frá sær

Victor Ponta boðar í morgun frá, at hann fer ikki at leggja frá sær sum forsætisráðharri, hóast hann tapti forsetavalið.

55 ára gamli Klaus Iohannis hevur í valstríðnum lagt dent á, at hann fer at stríðast ímóti korrupsjónini í landinum, og at seta búskaparligar nýskipanir í verk.

Rumenia er limur í ES, men landið er fátækt - bara Bulgaria er fátækari.

ES fylgir væl við gongdini í Rumenia, tí nógv svik er í landinum, og mett verður ikki, at landið er nóg búgvið at vera við í Schengen-samstarvinum.

Forsetin í Rumenia stendur á odda fyri uttanríkispolitikkinum, verjupolitikkinum og rættarskipanini í landinum.