Farloyvisskipanin sparir ALS pening

Tað ørkymlaði Vinnunevndina hjá løgtinginum, at nevndin fekk at vita frá Vinnumálaráðnum um farloyvisskipanina hjá ALS, at broytingin verður útreiðsluneutral.

Vinnunevndin fekk at vita frá ALS, at ALS fer at spara millum tríggjar og fýra milliónir krónur um árið.

Vinnunevndin spurdi tí Vinnumálaráðið, hvussu hetta ber til.

Nýtt fyri Vinnumálaráðnum

Vinnumálaráðið svarar, at tá tað gjørdi lógaruppskotið um broytingar í ALS, visti tað ikki betur, at broytingin var útreiðsluneutral.

At ALS fer at spara nakrar milliónir krónur, tá farloyvisskipanin verður broytt, var nýtt fyri Vinnumálaráðnum.

Vinnumálaráðið hevði ikki tær upplýsingarnar, tá uppskotið varð latið løgtinginum. 

ALS metti eisini í fyrsta umfari, at broytingin fór hvørki at kosta meira ella spara ALS pengar. Men seinni komu tey í ALS eftir, at broytingin fer at geva tríggjar-fýra milliónir krónur í sparing um árið.

Í fjør brúktu 40 fólk farloyvisskipanina hjá ALS. Higartil í ár hava 36 fólk brúkt hana. Síðani aldaskiftið hava knappliga 300 fólk brúkt farloyvisskipanina, sum nú skal takast av.