Vilja hava greining um støðuna í heilsuverkinum

Tjóðveldi og Javnaðarflokkurin vilja hava landsstýrismannin í heilsumálum sum skjótast at geva løgtinginum eina greining um álvarsomu støðuna í heilsuverkinum og harafturat koma við greiðum ætlanum um loysnir.

Tað siga løgtingskvinnurnar Bjørt Samuelsen, Sirið Stenberg og Rigmor Dam í álitinum hjá Trivnaðarnevndini um uppskotið hjá Karsten Hansen, landsstýrismanni, um at tryggja øllum endurvenjing á sjúkrahúsi.

Minnilutin í Trivnaðarnevndini sigur seg ikki kunna taka ábyrgd av broytingunum í lógini um almenna heilsutrygd, sum støðan er í heilsuverkinum, og mælir løgtinginum frá at samtykkja uppskotið.

Fólk eiga at fáa endurvenjing á sjúkrahúsi

Sambært uppskotinum eiga fólk at fáa endurvenjing á sjúkrahúsi, hóast endurvenjingin ikki er tengd at viðgerð á sjúkrahúsinum. Minnilutin í Trivnaðarnevndini vísir á trotið á fakfólki og serlæknum á sjúkrahúsunum.

Minnilutin kennir seg ikki sannførdan um, at uppskotna broytingin fer at bøta um støðuna hjá sjúklingum at fáa tilvísing til ta serviðgerð, sum fakfólkini meta er neyðug.

Eisini meirilutin í Trivnaðarnevndini, samgongufólkini, vísir á, at avbjóðingin at manna sjúkrahúsini eigur at takast í størsta álvara, men mælir kortini til at samtykkja lógarbroytingina.