- Tíðindi, mentan og ítróttur
Eygleiðarar: Fólkatingsval útskrivað fyrsta dagin
Roknað verður fyri vist, at danski forsætisráðharrin, Helle Thorning-Schmidt, fer at útskriva fólkatingsval fyrsta dagin.
Tað meta eygleiðarar, eftir at danski innanríkis- og búskaparmálaráðharrin, Morten Østergaard, í gjár avblásti kreppuna, sum hevur verið seinastu árini.
Hann grundgav avgerðina við, at 38.000 fleiri hava fingið arbeiði frá miðskeiðis í 2013 til árslok í fjør, og tá er Danmark ikki longur í kreppu, sigur hann.
Vánaligar meiningakanningar
Men ein bági er, og tað er at stjórnin stendur seg ikki serliga væl í meiningakanningunum, og eftir teimum at døma, verður tað blái vongurin, sum fer at vinna valið.
Fyrrapartin verður tíðindafundur á Christiansborg, har stjórnin fer at almannakunngera eina búskaparfrágreiðing, sum skal vísa framgongdina í Danmark.
Og tá hon er almannakunngjørd, vænta eygleiðarar, at val verður útskrivað ein av fyrstu døgunum.
Seinasta meiningakanningin vísir, at blái vongurin í fólkatinginum fær 54,3 prosent av atkvøðunum, og reyði vongurin 45,6 prosent. Tað hevði givið andstøðuni 96 sessir og samgonguni 79 umboð í fólkatingið.
Tað er Voxmeter sum hevur gjørt kanningina, og tann triðja á rað, har munurin er so stórur.
Eftir eini kanning, sum Megafon hevur gjørt fyri TV2, er munurin ikki so stórur. Sambært henni fær andstøðan 52 prosent og samgongan 48 prosent av atkvøðunum.
Útlendingar flestu arbeiðsplássini
Hóast danska stjórnin hevur avlýst kreppuna, so eru ikki øll eins væl nøgd.
M.a. vísir Danska Arbeiðsgevarafelagið á, at av teimum næstan 40.000 nýggju arbeiðsplássunum, sum stjórnin sigur eru fingin til vega í privatu vinnuni, hava útlendingar fingið meiri enn 30.000.
Tað er ikki ein nøktandi gongd fyri danska samfelagið, sigur Danska Arbeiðsgevarafelagið.