Vísitalið váttar búskaparliga framgongd

Hagstovan ger nú konjunkturkanningina, sum Fíggjarmálaráðið plagdi at gera. Nýggjasta kanningin er júst kunngjørd.

Sambært henni er yvirskipaða vísitalið, sum Hagstovan nevnir samanvigaða vísitalið, hækkað úr 18 í januar í ár upp í 23. Men tað var 37 í juni í fjør.

Samanborið við januar í ár eru vísitølini fyri tilfeingisvinnur og annan ídnað og tænastuvinnur hækkað, men vísitølini fyri byggivinnu og handilsvinnu eru lækkað.

Vanlig fólk og vinnulívsfólk verða spurd, hvussu tey meta um støðuna, og síðani verður konjunkturbarometrið gjørt eftir tí, sum tey spurdu svara.

Konjunkturbarometrið fyri juni 2015 stuðlar undir onnur hagtøl, sum í hálvtannað ár hava givið eina greiða mynd av búskaparligari framgongd í Føroyum, skrivar Hagstovan á sínari heimasíðu.