Komið upp á hægsta politiska stig í Danmark

Uttanríkisráðharrin er spurdur um fiskiskap, sum er sagdur at vera brot á altjóða lóg, tí fiskað er í sjónum hjá Vestursahara, sum Marokko hevur hersett. Ráðharrin er biðin um at steðga Asbjørn Senior. Tí sleppur hann kortini undan, tí Asbjørn Senior liggur nú í Hirtshals.

Christian Juhl, fólkatingsmaður hjá Eindarlistanum, hevur biðið Uttanríkisnevndina hjá Fólkatinginum spyrja ráðharran um fiskiskapin hjá Asbjørn Senior vestan fyri Vestursahara, fiskiskapur, sum er sagdur at vera brot á altjóða lóg og á eina samtykt hjá fólkatinginum.

Orsøkin er, at Marokko, sum hevur hersett Vestursahara, selur fiskirættindi í sjónum við Vestursahara uttan um Saharawiafólkið í Vestursahara. Hesum hevur Danmark vent sær móti í millum annað ES.

Vil vita hvussu endurtøkur kunnu forðast

Christian Juhl spyr uttanríkisráðharran, hvat hann fer at gera fyri steðga fiskiskapinum hjá Asbjørn Senior og forða fyri endurtøkum. Fyrispurningurin kom dagin eftir eina grein á heimasíðuni fiskur.fo um Asbjørn Senior.

Har stendur, at Emhamed Khadad, umboð fyri saharawisku stjórnina í útlegd, tann 10. juli skrivaði til Kaj Leo Holm Johannesen, løgmann, og Alex N. Vilhelm, stjóra í Ocean Group Faroes, sum átti Asbjørn Senior, áðrenn hann varð seldur fyrst í juni.

Í brævinum biður Emhamed Khadad teir báðar síggja til, at fiskiskapurin hjá Asbjørn Senior heldur uppat, tí hann er ólógligur. Asbjørn Senior skal hava fiskað sunnan fyri Vestursahara fyrst í juli.

Skipið selt men framvegis skrásett í Føroyum

Eingi lond viðurkenna, at Marokko nú hevur havt Vestursahara hersett í 40 ár og hevur eyðrænt tilfeingið hjá fólkinum har, millum annað fiskastovnarnar.

Bæði ST og altjóða dómstólurin í Haag hava fordømt hersetingina. Asbjørn Senior varð í summar seldur til Belis.

Asbjørn Senior er givin við fiskiskapinum við Vestursahara, sum skilst, tí hann skuldi bara vera har í tríggjar mánaðir. Skipið kom til Hirtshals fyri tveimum vikum síðani og hevur ligið har síðani.

Tað eydnaðist ikki útvarpinum at fáa orð á Alex N. Vilhelm, stjóra í Ocean Group Faroes, fyrrapartin.