Joen Magnus í tingið

Nú Annika Olsen hevur boðað frá, at hon fer at biðja um farloyvi úr løgtinginum, kemur Joen Magnus Rasmussen úr Fólkaflokkinum í tingið. Hann er nummar seks á listanum.

Annika Olsen var millum tey seks, vórðu vald fyri Fólkaflokkin á løgtingsvalinum 1. september. Men beint eftir valið tók hon seg úr Fólkaflokkinum, sum tí misti ein tingsess. 

Á tingfundinum hósdagin, tá nevndarval var á skránni, boðaði Annika Olsen frá, at hon var farin upp í Framsókn, og hon varð síðani vald til forkvinnu í fíggjarnevndini. 

Í gjárkvøldið boðaði Annika Olsen so frá, at hon var farin úr Framsókn og fíggjarnevndini, og at hon nú fer í farloyvi.

Á løgtingsvalinum fekk Joen Magnus Rasmussen fekk 278 atkvøður, fimm fleiri enn Janus Rein.