Ætlar at spyrja landsstýrismannin um kostnaðin

Løgtingskvinna ætlar at spyrja landsstýrismannin, hvussu nógv bíligari tað er at hækka og breiðka gomlu tunlarnar í Borðoynni enn at gera nýggjar

Hvussu nógv bíligari er at hækka og breiðka gomlu tunlarnar í Borðoynni enn at gera nýggjar, ætlar Elsebeth Mercedis Gunleygsdóttir í Fólkaflokkinum at spyrja Henrik Old, landsstýrismann í samferðslumálum

Høgni Djurhuus

Bjarni Mohr

08.10.2015 - 15:57

Elsebeth Mercedis Gunleygsdóttir í Fólkaflokkinum ætlar at spyrja Henrik Old, landsstýrismann í samferðslumálum, um tunlarnar norður um fjall í Borðoynni.

Hon spyr um munin á kostnaðinum fyri at vita, um til ber at fara fyrr í gongd í Borðoynni, um verandi tunlar verða hækkaðir og breiðkaðir.

Vil eisini vita, hvussu verður við trygdini

Elsebeth Mercedis Gunleygsdóttir sigur, at Rættarnevndin hjá løgtinginum, har sum hon var forkvinna í farna valskeiði, var í Sveis í mai í 2013 fyri at kunna seg um tunnilsgerð har.

Rættarnevndin fekk tá at vita, at tað er bíligari at hækka og breiðka tunlar enn at gera nýggjar. Løgtingskvinnan spyr eisini landsstýrismannin, um nakað verður gjørt við trygdina í tunlunum í Borðoynni.

Í verandi langtíðaríløguætlan hjá landinum eru tunlarnir Norður um Fjall raðfestir í 2021 til 2024. Á næsta tingfundi, sum verður 21. oktober, skal løgtingið atkvøða. um Henrik Old skal svara fyrispurninginum.