Fá lógaruppskot komin í Løgtingið

Bara trý lógaruppskot komu í Løgtingið úr landsstýrinum í gjár, nú freistin at leggja fram uppskot, sum skulu avgreiðast fyri ársskiftið, er úti

Bert trý lógaruppskot komu úr landsstýrinum í tingið í gjár, týsdagin. Næsti tingfundur verður um eina viku

Høgni Djurhuus

Bjarni Mohr

04.11.2015 - 10:46

Landsstýriskvinnan í almannamálum hevur eina málsliga rætting í lógini um arbeiðsfremjandi tiltøk, um pengar til fólk, sum eru yngri enn 25 ár. Landsstýriskvinnan í mentamálum biður tingið broyta lógina um gymnasialar miðnámsútbúgvingar.

Skotið verður upp, at til ber at hava fleiri enn níggju próvtøkur fyri tey, sum velja fleiri A-stig, enn kravt er, fyri at sleppa undan at vita nøkunlunda frammanundan, hvørjar lærugreinar verða tiknar út til próvtøku.

Løgmaður hevur lagt fram uppskot um ríkislógartilmæli um at broyta reglurnar í rættargangslógini, so videoavhoyring eisini kann brúkast, tá 13 og 14 ára gomul børn verða avhoyrd um siðabrotsverk, blóðskemd ella harðskap í familjuni.

Í galdandi lóg er hetta bara galdandi fyri børn 12 ár ella yngri. Eisini skulu ung undir 18 ár í serligum førum kunna videoavhoyrast í staðin fyri at geva frágreiðing beinleiðis í rættarsalinum. Einki uppskot kom frá andstøðuni á tingfundinum í gjár.