Halda lýsingar skulu halda fram í Kringvarpinum

Tað kemur fram í viðmerkingum, sum Samskifti hevur gjørt í samband við uppskot um broytingar í løgtingslóg um kringvarp og broytt kringvarpsgjald.

Mentamálaráðið hevur sent út uppskotið til løgtingslóg til hoyringar. Felagið Samskifti hevur bert viðmerkingar til punkt trý, - um at “inntøkur frá sjónvarpslýsingum fara í landskassan.”

Yvirskipað tekur Samskifti undir við, at pengar fyri lýsingar fara í landskassan. Men felagið metur ikki, at lýsingar í Kringvarpinum er ein trupulleiki.

Trupulleikin er trúvirðið, ikki lýsingarnar

Tað er trúvirðið, sum verður trupulleikin, tí mett verður, at lýsingar máa av trúvirðinum hjá einum public service stovni.

Støðan hjá Samskifti er, at tað eru ikki lýsingarnar sjálvar, sum kunnu sáa iva um trúvirðið - tað eru pengarnir, sum gera tað. Um Kringvarpið gerst fíggjarliga óheft av lýsingunum, so er trúvirðið tryggjað, sigur felagið.

Samskifti mælir til, at lýsingainntøkurnar fara í filmsgrunn, sum millum annað kann verða við til at stimbra føroyska filmsframleiðslu. Samskifti tekur ikki undir við, at lýsingar verða bannaðar í útvarpinum.

Vilja eisini varðveita sjónvarpslýsingar

At banna lýsingar í útvarpinum er við til at minka um talið av lýsingarpallum hjá føroyskum fyritøkum, og harvið eisini teirra samskifti við kundar og aðrar áhugapartar.

Hetta verður mett sum óneyðug skerjing. Sýnisgluggin í Kringvarpinum er neyðugur, serliga tí hetta er einasti sýnisgluggi fyri sjónvarpslýsingar í Føroyum.

Hetta er týdningarmikil miðil sum Kringvarpið eigur at halda fast við, sigur felagið Samskifti í viðmerkingum.