Ikki hoyrd um innkomuveg

Fólk á Hvítanesi eru ikki hoyrd í málinum um tunnilsmunnan og innkomuvegin til Eysturoyartunnilin.

Kunningarfundurin um tunnilsarbeiðið varð hildin tveir dagar eftir, at fyrstu maskinurnar fóru at grava fyri vegnum.

Tað siga staðbundnu limirnir í Hvítanesnevndini í einum almennum skrivi til løgtingið, aðalráðini í landsfyrisitingini og Tórshavnar kommunu.

SÍ EISINI Uppmátingarnar til Eysturoyartunnilin byrjaðar

Á kunningarfundinum varð upplýst, at 6.500 bilar fara at koyra aftur og fram um samdøgrið. Upplýst varð, at tunnilsfelagið hevur fingið øll neyðug loyvi, og at jørð er keypt til endamálið.

Fyri Hvítanes fer vegurin at hava fleiri neilig árin, m.a. mist byggilendi og færri møguleikar at vaksa um bygdina, ógvuliga sjónligan veg beint við bygdina, og vandi verður fyri nógvum óljóði av ferðsluni.

Vístu á aðrar møguleikar

Á fundinum vístu hvítanesfólk á ymsar møguleikar, sum kunnu verja bygdina fyri árininum av vegnum, sum ætlanin er at gera. Men tey vilja fyrst og fremst hava vegin fluttan longri burtur frá bygdini.

Staðbundnu limirnir í Hvítanesnevndini leggja dent kortini á, at fólk á Hvítanesi vilja ikki steðga Eysturoyartunlinum, tí hann er ein skilagóð samfelagslig íløga.

Staðbundnu limirnir í Hvítanesnevndini eru Bárður H. Joensen, Esmar A. Joensen og Christian A. Djurhuus.