Tunnilin liðugur í summar

Íbúgvarnir á Viðareiði nýtast ikki longur óttast fyri, at tey skulu koyra eftir Viðareiðisvegnum komandi vetur. Longu í summar kann nýggi tunnilin til bygdina takast í nýtslu. Tað skrivar Landsverk.

Í dag skrivaðu Ewald Kjølbro, stjóri á Landsverki, og John Eli Olsen, stjóri í El-Service, undir sáttmála um alt elarbeiðið í tunlinum. El-Service átti lægsta boð, 7,3 mió. krónur, ið fevnir um at seta upp ljós og trygdarútgerð í tunlinum.

SÍ EISINI Støða ikki tikin til asfalteringina

Nýggja farleiðin fevnir um 1.950 metrar langa tunnilin við portalum, og 3.700 metrar tilkoyringarveg Hvannasundsmegin og úr Miðdali til Viðareiði.

Seinastu ferðslutølini, sum eru frá 2012, vísa, at 432 akfør um samdøgrið koyrdu eftir Viðareiðisvegnum. Í 2024 er ferðslan mett at vera komin upp í 510 bilar um samdøgrið.

Samlaði fíggjarkarmurin til Viðareiðis er 162 mió. krónur. Arbeiðið við nýggju viðareiðisfarleiðini hevur gingið avbera væl. So væl, at tunnilin kann takast í nýtslu longu í ár, sum er eitt heilt ár áðrenn upprunaligu ætlanina, skrivar Landsverk.