Føroya Tele verri úrslit í fjør

Føroya Tele hevði verri úrslit í fjør, enn árið fyri.

Úrslitið eftir skatt í fjør var knappar 30 milliónir krónur í avlopi.

Tað boðar Føroya Tele frá í tíðindaskrivi.

Fyri skatt var úrslitið 39,8 milliónir kr. í avlopi, og eftir skatt var avlopið  29,8 milliónir krónur. Í fyrraárið var úrslitið eftir skatt 58,3 milliónir krónur.

Verður hugt nærri at roknskapinum, sæst, at úrslitið fyri avskrivingar var góðar 138 milliónir krónur í 2015 samanborið við 162 milliónir krónur í 2014.

Landskassin 25 mió. kr. í vinningsbýti

Føroya Tele hevði aðalfund í gjár. 

Aðalfundurin gjørdi av at rinda eigaranum, sum er Føroya landsstýri, 25 milliónir krónur í vinningsbýti.

Á aðalfundinum varð ein broyting gjørd í nevndini. Ólavur Ellefsen er farin úr nevndini, og fyri hann hevur landsstýrismaðurin í vinnumálum valt Johnni Poulsen.

Í nevndini sita Ómar Svavarsson, Gloria Kalsø, Annbritt Klausen og Johnni Poulsen.

Poul Poulsen, Ólavur Simonsen og Osvald Joensen eru starvsfólkavaldir nevndarlimir.

Ómar Svavarsson er formaður, og Gloria Kalsø er næstforkvinna.