Drap minst 50 fólk: Gerningsmaðurin eyðmerktur

Tað var 29 ára gamli Omar Mateen, sum skeyt frá hond og drap í minsta lagi 50 fólk í einum náttklubba fyri samkynd í Orlando í amerikanska statinum Florida í gjár.

Tað váttaði samveldisløgreglan, FBI, á tíðindafundi í gjárkvøldið. FBI váttaði eisini, at Omar Mateen, áðrenn hann trokaði seg inn í náttklubban, ringdi til løgregluna og segði, at hann svór yvirgangsfelagsskapinum Islamskum Stati trúskap.

Seinni frættist, at Islamskur Statur hevði átikið sær skyldina fyri yvirgangsatsóknina. Men sambært dagblaðnum New York Times bendir í løtuni einki á, at Mateen hevði fingið hernaðarliga venjing í IS.

Ikki tilknýti til Islamskan Stat

Heldur einki bendir á, at nakað beinleiðis samband var millum Mateen og Islamskan Stat. Ongantíð hava so nógv fólk latið lív í einum skottilburði í USA.

Umframt tey deyðu, vórðu í minsta lagi 53 fólk særd. Reuters skrivar, at FBI hevur havt eyguni eftir Omar Mateen, og løgreglan hevur avhoyrt tvær ferðir.

Men málið varð slept, tí hildið var ikki, at hann var vandamikil. Sambært amerikanska løgmálaráðnum keypti Omar Mateen lógliga vápn.

Men tað er ikki greitt, um hann nýtti hesi vápnini í atsóknini í gjár. Mateen var amerikanskur ríkisborgari, men bæði foreldrini eru afganar.