Meira makrelur gýtur í føroyskum havøki

Tað siga fyribils úrslit frá kanningunum hjá Magnusi Heinasyni í mai og juni. Hesar kanningar verða gjørdar triðja hvørt ár millum Biskayavíkina og norður til Føroya.

Tólv altjóða kanningarferðir verða gjørdar frá februar til juni. Magnus Heinason ger kanningar í norðasta parti av gýtingarøkinum hjá makreli.

Heildarmeting gerast í summar

Stóra broytingin í ár er, at so nógv rognkorn eru funnin so langt norðuri og so seint í gýtingartíðini. Sambært Havstovuni ber tó ikki til at siga enn, hvat hetta merkir fyri makrelstovnin.

Ein heildarmeting verður gjørd seinni í summar, tá úrslitini frá øllum skipunum, sum vóru við í kanningunum, eru uppgjørd.

Tíggju lond eru við í hesum kanningum, Føroyar, Ísland og átta ES-lond. Havstovan upplýsir, at nakrir av manningini á Magnusi Heinasyni royndu eftir makreli við tráðu, og var makrelur javnan at fáa á allari siglingarleiðini.