Dregur út at fáa sáttmálan góðkendan

Hóast Løgtingið tann 12. apríl samtykti at góðkenna fríhandilssáttmálan við Turkaland, hevur turkiska tjóðartingið ikki góðkent sáttmálan enn, so hann er ikki komin í gildi.

Turkaland og Føroyar skrivaðu undir fríhandilssáttmála fyri jól í 2014. Men hann fer ikki at virka, fyrr enn bæði tjóðartingini hava góðkent hann.

Tað kemur illa við hjá teimum, sum selja fisk úr Føroyum, at tollur og aðrar forðingar framvegis eru í Turkalandi.

Vinnuhúsið spurdi 16 fiskaútflytarar, hvar teir helst vilja sleppa framat við sínum vørum. Turkaland er ovast í listanum, síðani koma Brasil, Suðurkorea og Kina.