Eyka fiskidagar lunkaða móttøku í Fiskivinnuráðnum

Móttøkan í Fiskivinnuráðnum var ikki meira enn lunkað, tá tað hálvan juli viðgjørdi uppskotið hjá Høgna Hoydal, landsstýrismanni, um eyka fiskidagar til teirra, sum hava brúkt sínar egnu dagar.

Frystilínuskipini fáa ikki gagn av uppskotinum, tí tey leggja árið soleiðis til rættis, at tey goyma sær fiskidagarnar og royna á fjarleiðum fyrst. 

Reiðarafelagið helt, at uppskotið var so torgreitt, at Fiskimálaráðið átti at víst tí frá sær.

Meginfelag útróðrarmanna mælti frá at samtykkja uppskotið, og Ráfiskaseljarafelagið mælti til, at Fiskivinnuráðið fær uppskotið aftur, tá fiskidagarnir fyri næsta fiskiár eru ásettir.

Skilagott uppskot

Skipara- og navigatørfelagið heldur uppskotið vera skilagott, og Fiskimannafelagið gjørdi vart við, at fiskidagar eru ætlaðir teimum, sum reka vinnuligan fiskiskap. Í framtíðini eiga aðrir bólkar ikki at fáa fiskidagar.

Sambært gerðarbókini tekur Fiskivinnuráðið tó samanumtikið undir við, at tey, sum hava brúkt allar sínari fiskidagar, fáa fleiri dagar.

Vørn ger eins og feløg í fiskivinnuni vart við, at skotbráið at viðgera uppskotið er ov stutt.

Uppskotið um eykadagarnar fer at hava við sær meirkostnað fyri Vørn, tí KT-skipanin hjá stovninum skal broytast, so hon eisini kann umsita eyka fiskidagar.

Ikki møguleika at leggja til rættis

Høgni Hoydal ætlar, at í hvørjum bólki uttan tí hjá trolarum, skulu vera eyka fiskidagar, so skip og bátar, sum hava brúkt sínar dagar í verandi fiskiári, kunnu fáa fleiri dagar úr felagspuljuni næsta ár.

Grundarlagið fyri at fáa eykadagar í næsta fiskiári er tí verandi fiskiár, sum ikki endar fyrr enn 31. august. 

Vinnan fýlist á, at skip og bátar tí ikki hava havt møguleika at leggja fiskiskapin soleiðis til rættis í verandi fiskiári, at mest fæst burtur úr ætlaðu broytingunum.