Boðið út av nýggjum

Tórshavnar kommuna avjørdi í juli at bjóða arbeiðið, at gera Skúlan á Fløtum, út av nýggjum, tí boðini, sum komu inn, vóru alt ov høg.

Tað skrivar Tórshavnar Kommuna á heimasíðu sínari. Lægsta boðið átti MT Højgaard, sum bjóðaði sær til at byggja skúlan fyri 273 milliónir krónur.

Tað var 25 milliónir krónir meira, enn kommunan hevði mett kostnaðin fyri byggingina. Kommunan hevur arbeitt við at fyrireika nýtt útboð síðani í juli og nakrar broytingar eru.

SÍ EISINI Tilboðini vóru ov høg

Eitt nú eru felagsøki eittsindur minni og tekniskar loysnir innan ljós og ventilatión eru broyttar nakað. Trý feløg ella samtøk eru boðin inn at bjóða uppá skúlan.

Tey eru:

• P/F Articon og Sp/f Búsetur við undirarbeiðstakarum
• P/F MT Højgaard Føroyar við undirarbeiðstakarum
• P/F J&K Petersen, Sp/f Húsavarðatænastan og Sp/f TG Verk við undirarbeiðstakarum

Lisitatiónin verður 20. oktober 2016 klokkan 14:00. Skúlin á Fløtum verður umleið 11.600 fermetrar stórur. Til samans verða umleið 850 næmingar og 100 starvsfólk á skúlanum.

Skúlin verður bygdur í trimum byggistigum árini 2018-20. Í juni 2016 varð farið undir avgrevstur úti á Fløtum, sum er um at verða liðugur.