Fiskimannafelagið orðað uppskot til nýggja skipan

Útlutingin skal fara fram umvegis eina almenna tilfeingisbúð, og treytir skulu setast til hvørt einstakt loyvi, sum verður tíðaravmarkað. Fiskimannafelagið hevur sítt egna uppskot til nýggja fiskivinnuskipan.

Fiskiloyvi skulu latast fyri eitt hóskandi tíðarskeið, kanska 12 ár, so umstøðurnar at virka vera tryggar, tá tað snýr seg um fígging og at leggja veiðu, framleiðslu, sølu og marknaðarføring til rættis, heldur fiskimannafelagið.

Tilfeingisskatturin skal vera flatur

Fiskiloyvi skulu bara latast feløgum, har allir eigararnir eru heimahoyrandi í Føroyum, heldur Fiskimannafelagið. Fyri at fiskiloyvini ikki skulu savnast á ov fáum hondum, skal eingin einstakur persónur ella einstakt felag hava brúksrætt til meira enn ein ávísan prosentpart.

Ein tilfeingisskattur verður afturat partafelagsskattinum, ið skal tryggja øllum føroyingum ein part av fólksins ogn, vil Fiskimannafelagið. Tilfeingisskatturin skal roknast av úrslitinum hjá hvørjum einstøkum skipi sær.

Fiskimannafelagið vil, at tilfeingisskatturin verður flatur. Sama skattastig skal vera fyri allar skipabólkar. Eisini heldur meirilutin í Fiskimannafelagnum, at fiskidagaskipanin ikki skal takast av.