Samband ikki millum fólkaminking og ferðaætlan

Samband er ikki millum minkandi fólkatalið í Hesti og tær broytingar, Strandfaraskip landsins hava gjørt í ferðaætlanini gjøgnum árini.

Tað sigur Strandferðslan í kjalarvørrinum á fráboðanini, Útoyggjafelagið sendi út, har felagið sigur ferðasambandið vera orsøk til minkingina.

- Tað er ikki vantandi sigling, sum er orsøk til fólkaminkingina, eitt nú í Hesti, sigur Hilmar Eliasen, stjóri á Strandferðsluni, sambært ssl.fo

Orsøkin ikki so einføld

Í 2001, tá 51 fólk búðu í Hesti, vórðu sigldir 19 túrar um vikuna. Hóast Strandferðslan sigldi 22 túrar um vikuna til 2011 minkaði fólkatalið, sigur Strandferðslan.

Tískil ber ikki til at siga, at tað eru broyrtingar í ferðaætlanini hjá Strandferðsluni, sum eru grundin til minkandi fólkatalið í oynni, sambært stovninum.

- Fólkaminkingin má síggjast í einum breiðari høpi enn bara hyggja at farleiðunum, sigur Hilmar Eliasen, stjóri á Strandfaraskipum landsins.