Skylda ov nógvar lønir

Tað ber ikki til, at almennir stovnar ikki seta av pengar til lønir, sum starvsfólk eiga til góðar. Grannskoðarar hjá nógvum stovnum hava víst á tað

Samsvar ikki er millum roknskapin og veruligu nýtsluna hjá stovnum, siga løgtingsgrannskoðararnir

Høgni Djurhuus

Bjarni Mohr

02.12.2016 - 09:19

Mælt verður til at áseta eina meginreglu um, hvussu starvsfólkakostnaður, ið stovnurin skyldar, skal viðgerast roknskaparliga.

Eitt dømi er, at Landssjúkrahúsið við ársenda 2015 skyldaði 22 milliónir krónur í starvsfólkakostnaði. Tær milliónirnar eru ikki skrásettar í fíggjarstøðuni hjá sjúkrahúsinum.

Hetta átala løgtingsgrannskoðararnir, ikki bara í sambandi við Landssjúkrahúsið, men yvirskipað.

Ikki samsvar millum roknskap og nýtslu

Átalað verður, at almenn starvsfólk skylda ella eiga til góðar nógvar lønartímar, uttan at tað sæst í landsroknskapinum.

Úrslitið er, siga løgtingsgrannskoðararnir, at samsvar ikki er millum roknskapin og veruligu nýtsluna hjá stovninum.

Sambært Fíggjarmálaráðnum er eingin semja enn um yvirtíðina, sum yvirlæknarnir á Landssjúkrahúsinum eiga til góðar. Tí er eingin játtan í fíggjarlógini fyri 2017 til hesa yvirtíðina, sum ósemja er um.