SAS fremur sparitiltøk

Tann 1.januar fáa ferðafólk ikki longur ókeypis atgongd til uppihaldsstovur, lounges, á átta flogvøllum í Evropa og tann 1.februar leggjast 32 flogvøllir afturat.

Millum hesar uppihaldsstovur eru tær í Billund og Ålborg. Broytingin umfatar eisini eina uppihaldsstovu í USA og fýra í Asia. Tær uppihaldsstovur, sum SAS sjálvt rekur, vera tó framvegis tøkar hjá ferðafólki við serligum ferðaseðlum og kortum. 
SAS strikar eisini møguleikan hjá ferðafólkunum at sleppa skjótt gjøgnum trygdareftirlitð á nógvum flogvøllum.

Hesar uppihaldsstovur á flogvøllunum og møguleikan at sleppa skjótt gjøgnum trygdareftirlit eftir fast tracks vóru nakað av tí, sum SAS lokkaði við, tá felagið sendi fólk til Føroya í oktober at kunngera, at SAS fer at flúgva til Føroya tann 26.mars næsta ár.

Orsøkin til stigið hjá SAS viðvíkjandi uppihaldsstovum er sparing, tí tað kostar hjá SAS at sleppa upp í part í uppihaldsstovum, sum onnur eiga og reka, og sum skilst brúka ferðafólkini hjá SAS ikki hesar uppihaldsstovur so nógv.