Nógv rotta í høvuðsstaðnum

Tórshavnar kommuna fekk 202 fráboðanir um rottu í fjør, ein triðing fleiri enn í 2015.

Orsøkin er betri liviumstøður hjá rottuni, gott summar og lýggjur vetur.

Ein onnur orsøk til rottunøring er, at fólk geva fuglum og húsdjórum uttandura, sigur Byggi- og umhvørvisdeildin hjá býráðnum í brævi til ymsar stovnar í býnum.

Brævið er sent saman við einum nýggjum faldara um rottutýning, sum Búnaðarstovan hevur gjørt. 

Í sjey oyggjum

Í faldanum stendur, hvussu berast skal at, tá rotta er staðfest ella illgruni er um rottu. Rotta er í sjey oyggjum í Føroyum.

Kunngerðin um rottuoyðing er frá 1962. Men eitt uppskot um at broyta og dagføra kunngerðina er á veg.  

Heilsu- og innlendismálaráðið hevur gjørt uppskotið, tí tað áliggur fyrst og fremst kommununum at týna rottur.