Føroyar skulu talgildast

Meira enn helvtin av rokningunum, sum landið fær, eru talgildar.

Men hini 45 prosentini skulu eisini gerast talgildar, sigur Fíggjarmálaráðið, sum hevur sent tvey lógaruppskot um talgildu Føroyar til hoyringar.

Tey, sum senda fáar rokningar, kunnu tó sleppa undan at senda rokningar talgilt.

Skal vera undangonguland

Samgongan hevur sett sær fyri, at Føroyar skulu gerast undangonguland í talgilding í 2018. 

Lógin um talgildu, elektronisku, Føroyar er eitt avgerandi fet móti málinum, sigur Fíggjarmálaráðið. 

Lógin verður grundarlagið undir talgilda undirstøðukervinum fyri alt samfelagið.

Sambært Fíggjarmálaráðnum fer talgilda frambrotið at gera gerandisdagin lættari hjá øllum í Føroyum, hjá fólki, almennu fyrisitingini og hjá vinnuni.