Grønland: Fleiri flyta til høvuðsstaðin

Fólkatalið í Grønlandi stendur at kalla í stað, men fleiri flyta til høvuðsstaðin, Nuuk.

Tað vísa tøl frá grønlendsku hagstovuni.

1. januar búðu tilsamans 55.860 fólk í Grønlandi, 13 fleiri enn í fjør.

Fólkatalið vaks í Sermersooq kommunu, sum høvuðsstaðurin Nuuk hoyrir til. 

Triðingurin býr í høvuðsstaðnum

284 fólk fleiri búðu í Nuuk 1. januar enn í fjør. 31,5 prosent av øllum fólkinum í Grønlandi býr í høvuðsstaðnum, ella 17.600 fólk.

Tilsamans búgva 22.673 fólk í høvuðsstaðarkommununi.

Hinvegin minkar fólkatalið á bygd. Í løtuni búgva 7.356 fólk í smáu bygdunum, tað eru 79 færri enn í fjør. Fólkið flytir annaðhvørt til størru býirnar ella av landinum, sigur grønlendska hagstovan.