Uppskotið skjótt fyri tingið

Hoyringarfreistin er úti, og tilfarið, sum Fiskimálaráðið hevur fingið í sambandi við hoyringina, er rúgvismikið, sigur landsstýrismaðurin í fiskivinnumálum.

Nú verður hoyringartilfarið gjøgnumgingið, og síðani verður uppskotið endaliga orðað. Høgni Hoydal veit ikki í løtuni at siga, um uppskotið verður lagt fram fyri páskir ella beint eftir høgtíðina, men tað verður í apríl, sigur hann.

Mikudagin fer tingið at viðgera uppskotið hjá Høgna Hoydal um stovna fiskivinnugrunn og uppboðssølu av makreli, norðhavssild, svartkjafti og botnfiski í Barentshavinum í ár.

Í morgin fer Løgtingið eisini at viðgera uppskotini hjá Fólkaflokkinum um at leingja galdandi lóg um vinnuligan fiskiskap í trý ár og um nýggja fiskivinnuskipan.