Ikki klárt at brúka pening móti ridluskriða

Enn er ikki klárt at brúka tær 600.000 krónurnar, sum løgtingið játtaði í fíggjarlógini fyri 2017 til at berja niður vandan fyri ridluskriða.

Høgni Hoydal, landsstýrismaður, hevur aftur svarað spurningi, sum Bjørn Kalsø, løgtingsmaður, nú hevur sett honum tvær ferðir eftir nýggjár.    

Svarið er tað sama, málið er ikki liðugt viðgjørt. 

Høgni Hoydal sigur, at umráðandi er, at Búnaðarstovan og landsdjóralæknin eru samd um, hvussu játtanin kann brúkast til at taka fleiri blóðroyndir av seyði og kanna aliseyð við tí endamáli at basa ridluskriða.

Búnaðarstovan og landsdjóralæknin eru samd um at gera eitt felags tilmæli til landsstýrismannin ein av fyrstu døgunum.