Eftirlitið má herðast

Tað fer at kosta onkustaðni millum 10 og 20 milliónir krónur afturat um árið at hava eftirlit við fiskiskapinum, tá broytingarnar í fiskivinnunýskipanini eftir ætlan koma í gildi á nýggjárinum.

Tað metir Elmar Højgaard, stjóri á Vørn, sum serliga væntar munandi eftirlitisarbeiði, tá kvotuskipanin avloysir fiskidagaskipanina.

Tað er serliga avbjóðingin við útblaking, sum krevur eftirlit.

Í dag hevur Vørn bara tríggjar manningar til Brimil og Tjaldrið. Brimil siglir alt árið - men Tjaldrið liggur helvtina av árinum.

Sambært Elmari Højgaard er ein grundleggjandi fortreyt fyri einum nøktandi eftirliti við eini komandi kvotuskipan, at bæði skipini sigla alt árið. Stjórin manglar tí eina manning til Tjaldrið.

Men hóast manningin skuldi komið, so er Tjaldrið eitt somikið gamalt skip, at átrokandi neyðugt er við einum avloysaraskipi.

41 ára gamla Tjaldrið liggur bundið við kei helvtina av árinum, og átrokandi neyðugt er við einum avloysaraskipi, sigur Elmar Højgaard.