Viðgera nú fiskivinnuuppskotini

Vinnunevndin hjá løgtinginum er nú farin undir at viðgera uppskotini um nýggja fiskivinnulóg.

Í høvuðsheitum verður uppskotið hjá samgonguni viðgjørt, tí semja er um tað uppskotið. Øll samgongan tekur undir við tí.

Í dag fer Vinnunevndin at leggja tíðarætlan og gera lista við innkallingum, sigur Bjarni Hammer, formaður í nevndini. 

30-40 innkallingar

Hann væntar, at í hvussu so er 30 til 40 innkallingar vera. Tey fyrstu fáa boð um at koma mikudagin og hósdagin í næstu viku, sigur Bjarni Hammer.

Vinnunevndin hevur eisini onnur mál at viðgera, - millum annað uppskotið um at seta nýggjan partapeningin í Fiskaaling.

Tað uppskotið ætlar nevndin at fáa frá hondini týsdagin, sigur Bjarni Hammer.