Bíða til næstu tingsetu

Best er at bíða við fiskivinnunýskipanina til næstu tingsetu, sum byrjar ólavsøkudag, og útseta gildiskomuna í eitt ár í staðin fyri at hurla málið gjøgnum Løgtingið nú. - Tað er óðamannverk. 

Tað sigur Meginfelag útróðrarmanna í viðmerking til Vinnunevndina hjá Løgtinginum, sum viðger tey trý uppskotini um, hvussu fiskivinnan skal skipast eftir nýggjár.

So nógvar óvissur, og so nógvir ósvaraðir spurningar eru, at tað er bæði óforsvaligt og ábyrgdarleyst at skunda málið ígjøgnum. 

Nógvar ítøkiligar óvissur

Útróðrarmenn mæla til, at nýggj fiskivinnunýskipan kemur í gildi 1. januar 2019 í staðin fyri 2018. Og at málið verður reist aftur í næstu tingsetu.  

Meginfelagið nevnir nógvar ítøkiligar óvissur í uppskotinum hjá samgonguni, og tað hevur viðmekingar um ymiskt í lógaruppskotinum, serliga um uppboðssøluna. 

Felagið spyr eisini, hví innhaldið í teimum kanska 100 kunngerðunum, sum landsstýrismaðurin skal gera, skal dyljast sum mansmorð, áðrenn lógin er samtykt.