Hava aftur fund um kærurnar

Landsstýrismálanevndin fer nú aftur at viðgera tær fýra kærurnar, sum nevndin hevur fingið.

Fundur verður týsdagin.

Kæran frá Meginfelagi Útróðrarmanna um Høgna Hoydal, landsstýrismann, um fiskidagarnar í hesum fiskiárinum, sum endar 31. august, er framvegis til viðgerðar, og spurningurin er, um landsstýrismálanevndin kemur til eina niðurstøðu, áðrenn løgtingið samtykkir fiskidagarnar, sum skulu koma i gildi 1. september. 

Meginfelag Útróðrarmanna ótolnast eisini eftir einari avgerð. 

MÚ minnir á kæruna

Fyrst í juni minti Meginfelagið landsstýrismálanevndina á kæruna og spurdi, um nøkur niðurstøða kemur, áðrenn nýggir fiskidagar verða ásettir.

Høgni Hoydal hevur fingið freist til í morgin at svara viðmerkingunum, sum Meginfelagið sendi landsstýrismálanevndini 2. juni.

Landsstýrismálanevndin hevur tríggjar aðrar kærur, sum ikki eru avgreiddar, tvær um Høgna Hoydal og eina um Henrik Old.

Allar kærurnar eru á skránni fyri fundin hjá landsstýrismálanevndini týsdagin.