- Tíðindi, mentan og ítróttur
Eitt avboð afturat til landsliðið
NSÍ miðvallarin, Pól Johannus Justinussen verður ikki við móti Portugal.
- Eg fái ikki skúlan og landsliðsfótbólt at passa saman beint nú, og tað er orsøkin til at eg havi givið avboð til dystin ímóti Portugal, sigur Pól Jóhannus Justinussen við heimasíðuna hjá FSF.
Tað hevur við sær, at miðvøllurin hjá Føroyum er upp aftur meira skerdur. Frammanundan er greitt, at Hallur Hansson, Brandur Olsen og Fróði Benjaminsen vera ikki við móti Portugal.
Á tíðindafundi mánadagin kunngjørdi Lars Olsen, landsliðsvenjari, nøvnini á teimum 22 spælarunum, ið eru boðsendir til næstu HM-undankappingardystirnar, sum verða ímóti Portugal og Andorra.
Tá segði Lars Olsen, at miðverjin, Johan Troest Davidsen, ikki var úttikin, tí hann hevur givi avboð vegna arbeiði.
Hósdagin 31. august klokkan 19:45 spæla Portugal og Føroyar á Estadio do Bessa í Porto, og tríggjar dagar seinni, sunnudagin 3. september klokkan 17:00 spæla Føroyar og Andorra á Tórsvølli.
Fróði Benjaminsen verður ikki tøkur til dystin ímóti Portugal. Fróði er í læru sum fangavørður, og verður í komandi viku staddur uttanlands í arbeiðsørindum. Hann verður tó tøkur til dystin móti Andorra.
Mynd: Hans Erik Danielsen